Бүгін елордада Қазақстан мұсылмандары діни басқармасының төрағасы, Бас мүфти Наурызбай қажы Тағанұлының төрағалығымен аппарат жиналысы өтті.

Бас мүфти бес бағыт бойынша жеті айда атқарылған іс-шаралардың қорытынды есебін тыңдады. Атап айтқанда, бөлім меңгерушілері дін мен дәстүр, ізгі қоғам, ихсан және насихат, діни оқу-ағарту, сондай-ақ жат ағымдардан сақтандыру бағыттары бойынша атқарылған ауқымды жұмыстарды Бас мүфтиге баяндады.

«Бұл – біздің негізгі жұмыстарымызға басымдық берілген бағыттар. Сондықтан жыл басында бекіткен жұмыс бағыттарымызды ерекше ыждағатпен орындауымыз тиіс. Бұл жыл соңындағы қорытынды жұмыс есебінің көрсеткіші болмақ» деді Наурызбай қажы Тағанұлы.

Жиналыс барысында наиб мүфти Ершат Оңғар ҚМДБ Төрағасына биылғы қажылық маусымында атқарылған ауқымды іс-шаралардың есебін баяндады. Бас мүфти осы жылдың қаңтар-шілде айлары аралығында жүзеге асқан жұмыстарға оң бағасын беріп, бөлім меңгерушілері мен мамандарына тиісті тапсырмалар берді.

ДІНИ ҚЫЗМЕТКЕРЛЕРГЕ АРНАЛҒАН ОҚЫТУ СЕМИНАРЫ

             2023 жылғы 16 тамызда Солтүстік Қазақстан облысы әкімдігінің дін істері басқармасының жоспарланған жобалары аясында Қазақстан мұсылмандары діни басқармасының облыстық филиалының діни қызметкерлеріне арналған «Рухани келісім-конфессияаралық диалогтың негізі» тақырыбында оқыту семинары өтті.

Іс – шарада дін саласындағы жетекші сарапшылар: М. С. Тойғанов – Қостанай қаласы Ш. Қабылбаев атындағы Қазақстан Республикасы ІІМ Академиясының экстремистік идеологияға қарсы іс-қимыл ҚАЖ мамандарын даярлау орталығының басшысы, полиция подполковнигі, психология магистрі, саясаттанушы; Қайыргелді Руслан-оңалту орталығының басшысы, Алматы қаласы бас қалалық мешітінің наиб имамы; А. Н. Оразбаев- «Уақып» қорының президенті, Ермұрат Назарұлы-muftyat.kz. сайтының редакторы, ҚМДБ интернет-секторының маманы, Х.Қ. Әділбеков – облыстық «Қызылжар» мешітінің бас имамы сөз сөйледі.

Семинар барысында қатысушылар келесі мәселелерді қарастырды:
– діни қызметкердің этикасы, парасаттылық және сыбайлас жемқорлыққа қарсы мінез-құлық;
– мешіттің жамағаты арасында ақпараттық-түсіндіру жұмыстарының әдістері;
– деструктивті діни ағымдар идеологиясына бейім адамдармен профилактикалық жұмыстың негізгі принциптері;

– экстремизм мен терроризм идеологиясының беделін түсіруге бағытталған әлеуметтік желілердегі жұмыс;

-қайырымдылық қызметін ұйымдастыру және өткізу.

Іс-шара соңында қатысушыларға тақырыптық әдістемелік брошюралар таратылып, оқыту семинарынан өткені туралы сертификаттар табысталды

Діни оңалту жұмыстарын жүргізу және тәжірибе алмасу мақсатында Қызылжар орталық мешітінің наиб имамы Жұмажанов Мақсат Аманжолұлы арнайы іссапарамен Қарағанды облысына келді. Онда осы өңірдегі түзету мекемелерінде жазасын өтеушілермен және деструктивті  діни ағым өкілдерімен арнайы кездесу өткізді. Наиб имам Мақсат Аманжолұлы өзінің  екі апталық іссапары барысында мешіттердегі бес бағыт бойынша атқарылып жатқан жұмыстарымен танысады және жамағатқа уағыз айтып, жат ағымнан сақтану бойынша үгіт-насихат жұмыстарын жүргізеді.

Қызылжар орталық мешітінің баспасөз қызметі

ҚМДБ-ның оқу ағарту ісі бойынша «Имамдардың тәжірибе алмасу» мақсатында келген Шымкент қаласы орталық мешітінің бас имамының орынбасары Естеміров Мұхамеджан Жамантайұлы  бүгін «Қызылжар орталық мешітінде» жергілікті «Қызылжар» телеарнасының «Руханият» бағдарламасының жүргізушісіне сұқбат берді.

Онда журналист пен имамның сұхбаты әдептілік негізінде өрбіді.  Тақырыпқа арқау болған сәлем беру әдебі, бата алу, ата ананы құрметтеу әдебі, дұға ету әдебі, тамақтану әдебі туралы қойылған сұрақтарға  дін мен дәстүрді тоғыстыра отырып салмақты жауап берген имамға тележүргізуші өз алғысын білдірді.

Қызылжар орталық мешітінің баспасөз қызметі

Қызылжар орталық мешітінің жанынан балалар мен ересектерге арналған сауат ашу курсы жұмыс істейді. Биылғы жазда балалар үшін  «Имани жаз-2023» арнайы бағдарламасы әзірленіп, түрлі интеллектуалды ойындар, экскурсиялар, байқаулар өткізу жоспарланған. Осы жолғы шәкірттер «Қырық парыз» туралы байқауға қатысып, өздерінің білімдерін сынап көрді. Оның ішінде бес қыз, бес ер балаға арнайы сертификат табысталды.

Қызылжар орталық мешітінің баспасөз қызметі