Солтүстік Қазақстан облысында «Зекет және қайырымдылық» қоры өкілдігінің ұйымдастыруымен «мектепке жол» қайырымдылық акциясы өтті. Оған өңірдің бас имамы Хамзат Қажымұратұлы арнайы қатысты. Игі шара барысында әлеуметтік аз қамтылған, көпбалалы отбасыларға және жалғызбасты аналардың балаларына мектепке қажетті құрал-жабдықтары бар сөмкелер үлестірілді. Киім-кешектер де берілді. Ұйымдастырушылар қайырымдылық акциясына атсалысқан қолы ашық, жомарт жандарға ризашылығын білдірді. Айта кетейік, СҚО бойынша «Мектепке жол» қайырымдылық акциясы аясында 400 отбасыға көмек көрсетілді.
