Қызылжар орталық мешітінің ресми сайты
Қасиетті Қадір түніне орай Қызылжар Орталық мешітіне жиналған жамағатқа ауызашар берілген соң Рамазан айының құрметіне арнайы бағдарлама бойынша танымдық рухани сайыс өткізілді. Көпшілік қауымға викториналық сұрақтар жүргізіліп, алғыр жеңімпаздарға сыйлықтар үлестірді.
Солтүстік Қазақстан облыстық Қызылжар орталық мешітінің баспасөз қызметі
ҚМДБ жанындағы «Зекет» қорының «Ел үлесі – пәтерге» жобасы аясында әлеуметтік жағынан аз қамтылған мұқтаж отбасыға баспана кілті табысталды.
Қызылжар орталық мешітінде өткен қадір түнінде Солтүстік Қазақстан облысының бас имамы Хамзат Қажымұратұлы және Солтүстік Қазақстан облысы бойынша «Зекет және қайырымдылық қорының» жетекшісі Қасымхан Абдуллаұлы « Рамазан айының 30 күнінде -30 баспана» акциясы аясында 25 –ші баспананың кілтін мұқтаж отбасыға табыстады
Сондай-ақ жоғары оқу орындарында діни білім алып жүрген солтүстікқазақстандық шәкірттерге «Қолдан-қолға» жобасы аясында 1 500 000 теңгенің сертификаты табысталды.
Рамазан айына орай қуанышқа кенелген жандар демеуші, мұрындық болған азаматтарға ризашылық білдірді.
Солтүстік Қазақстан облыстық Қызылжар орталық мешітінің баспасөз қызметі
Мың айдан қасиетті Қадір түніне орай Қызылжар Орталық мешітінде ауызашар берілді. Қарилар қатар тұрып арнайы құран хатым дұғасын жасады.
Қадір түнінің қасиетін сезінуге мешітке ағылған жамағат қарасы көп болды. Бас имам Хамзат Қажымұратұлы «Қадір түні – мың айдан да қадірлі» тақыбырында уағыз айтып, жиналған жамағатқа қасиетті түнді дәріптеді. Рамазан айы құран түсірілген ай екені барша мұсылманға мәлім. Соған орай барлық мешіттерде құран хатым оқуға аса мән беріледі. Жылдағы дәстүр бойынша биылғы жылы да Солтүстік Қазақстан облыстық мешітіне Түркия елінен арнайы қари келіп құран хатым оқыды. Бүгінгі өткен Қадір түнінде барлығы үш қаримен бірге құран хатым дұғасы жасалды.
Қасиетті қадір түнін ғибадатпен өткізуге жиналған жамағатқа Орталық мешітте сәресі беріліп, көпшілік мешітте ауыз бекітті. Сап түзеп таң намазы оқылып, жұртшылық мың айдан да қадірлі болған Қадір түнінің жақсылығы мен сауабын тілеп, тағы да ел тыныштығы үшін және су тасқынынан зардап шегіп жатқан халық үшін дұға жасады.
Солтүстік Қазақстан облыстық Қызылжар орталық мешітінің баспасөз қызметі
ҚМДБ-ның Төрағасы, Бас мүфти Наурызбай қажы Тағанұлының «Бір мезетте бір дұға» атты игі бастамасына Солтүстік Қазақстан облысы өкілдігі мен жамағаты үн қосып, су апатына байланысты Құран оқып, дұға жасады.
Солтүстік Қазақстан облысының бас имамы Хамзат Қажымұратұлы бастаған дін қызметкерлері мен барлық аудандардың имамдары мен мешіт жамағаты бір мезетте алақан жайып:
«Уа, Алла Тағала! Осы оқылған қасиетті Құран аяттарының нұрымен халқымызды, елімізді, жерімізді нұрға бөлей гөр. Халқымызды табиғи апаттардан, зілзаладан, топан судан, өрттен, кеселден, түрлі індеттерден аман сақтай гөр!
Уа, Алла! тасқын судан жапа шеккен жерлестерімізге Өзің жар болғайсың. Олардың басына келген сынақтың соңын қайырлы ете гөр. Жерімізді тасқын судан сақтай гөр»,- деп дұға етті.
Солтүстік Қазақстан облыстық Қызылжар орталық мешітінің баспасөз қызметі
Қазақстан мұсылмандары діни басқармасының төрағасы, Бас мүфти Наурызбай қажы Тағанұлының «Бір мезетте бір дұға» игі бастамасына еліміздің барлық өңірінде мешіт имамдары мен жамағаты үн қосып, су тасқынына байланысты Құран оқып, дұға жасады.
Атап айтқанда, жамағатпен бір мезетте дұға жасау Астана, Алматы мен Шымкент қалалары, сондай-ақ облыс орталықтары мен аудандарында құптан намазы алдында ұйымдастырылды. Имамдар жамағатпен бірге су тасқынынан зардап шеккендерге жеңілдік тілеп, Алла Тағаладан елдің амандығы мен тыныштығын сұрап дұға тіледі.
muftyat.kz
Тайынша ауданының бас имамы Зиятбек Ахметұлының басшылығымен және мешіт жамағатының ұйымдастыруымен он екі айдың сұлтаны, қасиетті Рамазан айының кешінде аудан орталығындағы Жанар дәмханасында ораза ұстаған мұсылмандарға ауызашар берілді.
Оған Солтүстік Қазақстан облысының бас имамы Хамзат Қажымұратұлы қатысты. Ауызашарға арналып жайылған ақ дастарқанға жетпістен аса аудандағы ақсақалдар мен ақжаулықты аналар және арнайы мешіт жамағаттары шақырылған. Дастарқан басына жиналған қауымға бас имам арнайы сөз сөйлеп, жиналған жұртшылыққа тілегін білдірді.
Сонымен бірге бүгінгі қоғамда адам баласының өзгеруі, заманға бейімделуі, рухани толығу үшін құран негіздерін үйренуі туралы уағыз айтып, соңында Құран бағыштады. Одан соң аудан ақсақалдары жиналған қауымға ақ батасын берді.
Солтүстік Қазақстан облыстық Қызылжар орталық мешітінің баспасөз қызметі
Облыстық «Қызылжар» орталық мешітінің ұйымдастыруымен Манаш Қозыбаев атындағы Солтүстік Қазақстан университетінің шәкірттеріне ауызашар берілді.
Жатақхана алдында 1000 студентке ауызашарға қажетті тамақ (су,нан, палау, құрма) таратылды. Ауызашар Оразаның маңызды бөлігі, әсіресе қасиетті айда ораза ұстайтындар үшін тамақ қабылдауды кейінге қалдырмау немесе тоқтатпау өте маңызды.
Ораза тұтқан кісіге бір құрма немесе бір кесе сүт берген адам да ауызашар бергендей сауапқа ие болады. Пайғамбарымыз (с.ғ.с.):«Кімде-кім Рамазанда ораза тұтқан кісіге ауызашар берсе, күнәлары кешіріледі.
Алла Тағала Рамазан айында тұтқан оразамызды қабыл етіп, барлық қайырымды істерімізді сауаптан жазғай!
Солтүстік Қазақстан облыстық Қызылжар орталық мешітінің баспасөз қызметі
Қызылжар қаласы мен аудан мешіттерінің жамағаты тарауықтан кейін тегін таксимен қайтады.
Тегін такси жүргізетін қайырымды жандар тарауық намазынан соң жамағатты үйді-үйлеріне жеткізіп тастау міндетін алып отыр.
Тарауық уақыты кеш келеді. Көптеген азаматтары түнде таксимен қайтуды қалтасы көтермейді. Сондықтан, Рамазан айында осындай бастама көтергеніне жамағат алғыстарын айтуда.
Солтүстік Қазақстан облыстық Қызылжар орталық мешітінің баспасөз қызметі
Әлем мұсылмандарының сағына күтетін, айлардың сұлтаны болған қасиетті Рамазан айының келуі – баршамыз үшін үлкен қуаныш. Өйткені қасиетті Рамазан айы – мейірімділіктің, қайырымдылықтың, сабырлықтың, тақуалықтың, нәпсі тәрбиесі мен кешірімділіктің айы.
Алла елшісі (оған Алланың салауаты мен сәлемі болсын) Шағбан айының соңғы күнінде құтпа оқып, бұл айдың артықшылығы жайлы: «Уа, адамдар! Сендерге ұлы мүбарак ай келді. Бұл айда мың айдан жақсы бір түн бар. Алла Тағала күндіз оразаны парыз, түнде намаз оқуды нәпіл етті. Кімде–кім бұл айда Алла Тағалаға нәпіл ғибадатпен жақындайтын болса, басқа айда парызды орындағандай сауап алады. Ал парыз амалдарды орындаса, басқа айда орындаған жетпіс парызбен тең сауап алады. Бұл – сабыр айы. Ал сабырлықтың сыйы – жәннат…», – деп сүйіншіледі. Осы хадистегі «Бұл – сабыр айы. Ал сабырлықтың сыйы – жәннат» деген сөзге қысқаша тоқталып өтсек.
Жәннатты қалайсың ба? Онда сабырды серік ет. Жаратушының бұйырған құлшылықтарын орындауға, күнәдан сақтануға, қиындықтарға көркем түрде сабыр ет. Сабырлық дегеніміз не? Оның дінімізде алар орны қандай? Сабырлық – басқа түскен қайғы мен сынаққа шыдамдылық таныту. Тіліне ие болу, әртүрлі жаман әрекеттерден сақтану арқылы нәпсіні тәрбиелеу. Сабырлық – Ислам дінінің ахлағы, Алла Тағаланың сипаты, Пайғамбарлардың мінезі. Рамазан айында адам тән қалауын тәрбиелеп, өзін нәпсінің құлы болып кетуден сақтайды. Көп ұйқы мен көп тамақтану иманның әлсіреуіне алып келеді. Ал ораза ұстаған адамның денесі әрі рухы тынығады. Ең бастысы адамның қас дұшпаны болған нәпсіні тазартып, Раббысына жақындай түседі. Адам бұл жалғанда көптеген сынақпен бетпе-бет келеді. Себебі бұл өмірді сынақ пен емтихан алаңы деп те айтуға болады. Түрлі қиындық, қайғы мен ауру, кедейлік, малдың жұтауы, егіннің шықпай қалуы, жақындардың дүниеден өтуі, бұның бәрі – сынақ. Адам баласы сынаққа ұшырамай тұрмайды.
Құранда сабыр сөзі 103 жерде айтылады. Бұл – асыл дініміздің сабырлыққа ерекше мән бергенінің дәлелі. Қай салада болса да, сабырлық керек. Мүминнің өзгелерден ерекшеленіп тұратын жері – басына бір қиындық түссе сабырға келіп, жақсылыққа кенелсе шүкір етуінде.
Рамазан айында нәпсісін тәрбиелейді. Ауызды астан ғана емес, жаман сөзден тыяды. Көзді харамға қараудан, құлақты харам нәрселерді естуден тыяды. Көп ұйқы мен көп тамақтану иманның әлсіреуіне алып келеді. Ал ораза ұстаған адамның денесі әрі рухы тынығады. Ең бастысы адамның қас дұшпаны болған нәпсіні тазартып, Раббысына жақындай түседі. Себебі адам үшін ең ұлы күрес нәпсімен болатын күрес екенін Алла елшісі (оған Алланың салауаты мен сәлемі болсын) ескерткен болатын. Бір ай бойы күннің ыстығын мен суығына қарамай ашқұрсақ жүрген адамның бойында сабырлық пен шыдамдылық сезімі күшейіп, шыңдалады. Аштықпен нәпсісін тыйған мұсылман басқа қиындыққа да шыдайды. Сабырлы адам алдына биік мақсат қойып, діттеген мақсатына жете алады.
Имам Мүслим риуаят еткен хадисте: «Мұсылманның ісіне таң қаламын. Оның барлық ісінде бір жақсылық бар және бұл мұсылманнан басқа ешкімге берілмеген. Егер оған бір жақсылық келсе, ол Аллаға шүкір етеді де, бұл оған қайырлы болады. Ал басына бір қиындық түссе, сабыр етеді де, бұл оған қайырлы болады», – деген.
Рамазан – сабыр айы. Ал сабырдың сыйы – жәннат. Иманның жартысы – сабыр, екіншісі – шүкір. Иманның жартысын құрайтын сабырды осы айда шыңдай түсу қажет. Себебі ораза ұстаған адам жан-дүниесін тазартып, жаман қылықтан сақтанады.
Біріншісі, құлшылықтарды орындауға сабыр ету. Ерік-жігері мықты, ықыласты жандар ғана құлшылығына бекем болады. Екі ракағат намаз оқу, бір күн ораза ұстау сырттай жеңіл болып көрінгенімен, ұстамдылық пен сабырды талап етеді. Таңнан кешке дейін нәр татпау, кешке тарауық намызына қатысу, тәһажжудқа тұру, сәресіне ояну, Құран оқу және т.б. құлшылықтарға асқан төзім қажет. Сондай-ақ күні бойы жұмыс істеп, арасында ағайын-туыс пен жақынжуыққа көмектесу мен мұқтаждың қажетін өтеу үшін де сарқылмайтын сабырға зәруміз.
Екіншісі, күнәлардан сақтануға сабыр ету. Рамазан – тек қана ішіп-жеуден ғана емес, күнәлардан, жаман әдеттерден арылатын ай. Бұл айда адамның ауызы ғана емес, барлық дене мүшесі ораза ұстауы тиіс. Пайғамбарымыз (оған Алланың салауаты мен сәлемі болсын): «Кімде-кім ауыз бекіте тұра өтірік айтуын әрі оған әрекет етуін доғармаса, оның ішіп-жеуден ғана тыйылғаны Алла Тағалаға қажет емес», – деген. Тағы бір хадисте: «Қаншама ораза ұстаушылар бар. Олардың ұстаған оразасынан алатыны – аш жүргені мен шөлдегені ғана», – делінген.
Үшіншісі, қиындық, сынақтарға сабыр ету. Ораза ұстаған адам күні бойы күннің ыстық-суығына, шөлге, басқа да нәрселерге сабыр етеді. Егер адам Рамазан айында адал болған ішіп-жеуден нәпсісін тыйса, оған Алла Тағала арам еткен нәрселерден тыйылу қиындық тудырмайды.
Пайғамбарымыз (оған Алланың салауаты мен сәлемі болсын): «Ораза мен Құран пенде үшін Қиямет күні шапағат етеді. Ораза: «Уа, Раббым! Мен бұл құлыңды күндізгі уақытта ішіп-жеу мен шәһуаттан тыйдым. Енді мені оған шапағатшы ете гөр», – дейді. Құран да: «Мен түнде оны ұйқыдан тыйдым. Енді мені оған шапағатшы ет», – деп тілейді. (Оларға шапағат етуге рұқсат беріліп), екеуі шапағат етеді», – деп сүйіншілеген.
Оразаның тағы бір ерекшелігі – мұның сауабын Алла Өзі береді әрі оның есебі белгісіз. Шынайы ықыласпен тұтылған ораза үшін Раббымыз шексіз
сауап жазып, күнәсын кешіріп, әр-Раййан қақпасынан кіргізеді. Қасиетті Құранда: «Сабыр етушілерге берілетін сыйлық есепсіз», – десе, құдси хадисте Алла Тағала: «Ораза Мен үшін. Оның сыйын Өзім беремін», – деген.
Қорыта айтқанда, оразаның сауабын толық алғымыз келсе, Алла Тағала бұйырғандай, Пайғамбарымыз (оған Алланың салауаты мен сәлемі болсын) көрсеткендей, шарттарын, әдептерін тиянақты орындасақ қана, сансыз сауапқа ие боламыз.
Медет ҚҰРМАШҰЛЫ,
ҚМДБ Шариғат және пәтуа бөлімінің маманы
«Иман» журналы, №3, 2024 жыл
Биылғы жылы Рамазан айымен тұспа-тұс келген Наурыз мейрамы және «Ислам және Дәстүр құндылығы» аясында Тайынша аудандық мешітінде «Ақ бата» атты бата беру сайысы өтті. Сайысқа Тайынша ауданындағы мешіт жамағатынан іріктелген 10 -нан астам ақсақал қатысып, бата берумен қатар, діни білімдерін, салт-дәстүрге жетіктігін де сарапқа салды.
Қазылар алқасы ақсақалдардың бата беру шеберлігін, шешендігін бақылай отырып, үздігін анықтап, 1-ші орынға Есенбай Мұхамметғалиды, 2-ші орынға Бимағамбетов Сәлімжанды, 3-ші орынға Молдағали Кенжеғараны лайық деп тапты. Жүлдегерлердің барлығы арнайы «Алғыс хатпен» марапатталып, ақшалай сыйлықтарға ие болды.
Шара соңында Тайынша мешітінің бас имамы Зиятбек Ахметұлының ұйымдастыруымен қатысушыларға ауызашар дастарханы жайылды.
Солтүстік Қазақстан облыстық Қызылжар орталық мешітінің баспасөз қызметі
«Қызылжар» орталық мешітінің ұйымдастыруымен шәкірттер арасында Құран оқу жарысы ұйымдастырылды.
Солтүстік Қазақстан облыстық, Қызылжар орталық мешітінің бас имамы Хамзат Қажымұратұлы жас құраншыларға жарыстың шартын түсіндіріп, сәттілік тіледі.
Мұндай рухани шара биыл үшінші рет өткізіліп отыр.Жарысқа 5 жас пен 24 жас аралығындағы 70 үміткер шәкірт бақтарын сынады. Жарыстың ең жас қатысушысы Нашкенова Сафия 5 жаста. Ол 10 сүрені жатқа біледі. Нақтырақ айтсақ, жарысқа қатысушылар 5 номинация бойынша бақтарын сынады. Қазылар алқасының шешімімен 2 пара бойынша Зульфукарова Мумина, 1 пара бойынша Төлеухан Азамат, Жарты пара бойынша Амиров Загир, 10 сүре бойынша Нашкенова Сафия жеңімпаз деп танылды
Жарыстың ұтысына жалпы 1 миллион теңге шығарылған.
Жүлдегерлер шарттта берілген номинациялар бойынша ақшалай сыйлықтарды қанжығаға байлады.
Солтүстік Қазақстан облыстық Қызылжар орталық мешітінің баспасөз қызметі
Қазақстан мұсылмандары діни басқармасына қарасты еліміздің 565 мешітінде 637 қари күнделікті тарауық намазында Құран Кәрімді хатым етуде. Бұл туралы елордада Бас мүфти Наурызбай қажы Тағанұлының төрағалығымен өткен Аппарат жиналысында Құран секторының меңгерушісі Серік қари Ахмет баяндады.
«Алла қаласа, қариларымыз Рамазанның 27-і күні, яғни Қадір түнінде Құран Кәрімді толықтай оқып бітіріп, халықпен бірге хатым дұғасы жасалады. Сондай-ақ Құран секторы құрылған бір ай ішінде Алматы облысында тұңғыш рет имамдар арасында аймақтық Құран байқауы ұйымдастырылды. Сондай-ақ Астанада ерлер мен әйелдер арасында онлайн Құран сайысы өтті» деді сектор меңгерушісі.
Айта кетейік, қазіргі таңда елімізде 2854 мешіт жұмыс істеп тұр. Соның 565-інде тарауық намазында Құран Хатым жасалуда.
muftyat. kz
Return to Top ▲
