Қазақстан мұсылмандары діни басқармасының 2025 жылға арналған негізгі іс-шаралар жоспарына сәйкес, «Qamqor-Sharapat» салттық қызмет көрсету орталығының ұйымдастыруымен ел аумағындағы мұсылман зираттарында тазалық жұмыстары жүргізілді.

«Өткенге құрмет – тіріге міндет» ұранымен өткен сенбілікке ҚМДБ-ға қарасты барлық мешіттердің қызметкерлері, еріктілер және жергілікті зират әкімшіліктерінің мамандары белсене қатысты. Астана қаласында өткен тазалық жұмыстарына ҚМДБ Төрағасының орынбасары, наиб мүфти Ермек Қасболатұлы, ҚМДБ қызметкерлері, «Qamqor-Sharapat» орталығының директоры Мейрамбек Қабылбекұлы және Астана қаласының бас имамы Ерболат Нұрылдаұлы арнайы қатысты.

Сенбілік аясында зират маңы қоқыстан тазартылып, қоршаулар ретке келтірілді. Сонымен қатар, зираттардың кіреберісіне зиярат әдебі мен бейіт тұрғызу тәртібі туралы мәлімет беретін ақпараттық тақталар орнатылды.

Ислам шариғатында қайтыс болған мұсылманға құрметпен қарау – үлкен сауапты амал. Марқұмды жуындырып, кебіндеу, жаназа намазын оқу және оны жер қойнына тапсыру – мұсылманның парызы. Қабірлерді күтіп-баптау – марқұмға тағзым етудің, өткенге құрмет білдірудің жарқын үлгісі.

Солтүстік Қазақстан облысында Бірлік күніне орай жаңа Бірлік аллеясы ашылды. Орталық саябақта өткен салтанатты шараға облыс әкімі Ғауез Нұрмұхамбетов, Қазақстан халқы Ассамблеясының өкілдері, жастар, түрлі дін өкілдері және өңірдің бас имамы Хамзат Қажымұратұлы қатысты.

Шара барысында ағаштар отырғызылып, аллеяның ашылуы салтанатты түрде жарияланды. Бұл шара өңір тұрғындарының бірлігін, келешекке деген қамқорлығын және туған жерге деген сүйіспеншілігін көрсетуге бағытталған.

ҚМДБ Төрағасы, Бас мүфти Наурызбай қажы Тағанұлының бұйрығымен Мирзаев Имам Одинамахмудович облыс орталығындағы «Береке» шағын ауданының мешітіне наиб имам қызметіне тағайындалды.

Ол бұған дейін Ғ.Мүсірепов ауданы «Жұманқожа» мешітінің бас имам қызметін атқарған болатын. Бүгін қасиетті жұмада жаңа дін қызметкерін облыстық «Қызылжар» орталық мешітінің наиб имамы Мақсат Аманжолұлы жағамат алдында арнайы таныстырып өтті.

Бұдан бөлек, Айбек Сайдалин Қызылжар аудандық «Кәусәр» мешітінің наиб имам қызметінен босатылып, қалалық «Нұр мешітіне наиб имам қызметіне тағайындалды. Облыстық «Қызылжар» орталық мешітінің наиб имамы Аман Мұхамеджан ҚМДБ Төрағасы, Бас мүфти Наурызбай қажы Тағанұлының бұйрығын оқып, таныстырды.

Бұл күні барлық мешіттерде «НЕКЕ ЖӘНЕ ОНЫҢ ШАРИҒАТТАҒЫ МАҢЫЗДЫЛЫҒЫ» тақырыбында жұма уағызы айтылды. Жаңадан тағайындалған дін қызметкерлеріне сәттілік тіленді.

Алматыдағы «Нұр-Мүбәрак» университетінде жұмыс берушілер мен 2024-2025 оқу жылының түлектері кездесті. Маңызды басқосуға Солтүстік Қазақстан облысының өкілдері де қатысты. Облыстық «Қызылжар» орталық мешітінің өкілдері студенттермен жүздесіп, оларды солтүстік өңірге қызмет етуге шақырды.

Олардың айтуынша, Қызылжар өңірінде жас, білімді және ынталы дін қызметкерлеріне сұраныс жоғары. Солтүстік Қазақстан облысы – тарихы терең, мәдениеті бай өлке. Сондықтан діни сауаты жоғары, жаңашылдыққа бейім мамандардың келуі өңірдің рухани дамуына үлкен серпін береді.

Кездесу барысында студенттерге Қызылжар мешітінің жұмысы, атқарылып жатқан игі істері туралы айтып берді. Сонымен қатар, жас мамандарды қолдауға бағытталған әлеуметтік бағдарламалармен таныстырды.

«Біз сіздерді Қызылжар жерінде күтеміз. Біздің өңірде сіздер өз білімдеріңізді көрсетіп, дін жолында аянбай еңбек ете аласыздар. Біз жас мамандарға әрдайым қолдау көрсетуге дайынбыз», – деді Хамзат Қажымұратұлы.

«Нұр-Мүбәрак» университетінің студенттері имамдардың ұсынысын жылы қабылдап, Қызылжар өңірі туралы көбірек білуге қызығушылық танытты. Кездесу соңында студенттер өздерін қызықтырған сұрақтарды қойып, имамдардан кеңес алды. Сондай-ақ, 18 студентке «Зекет» қорының атынан шәкіртақы табысталды.

Солтүстік Қазақстан облысының «Қызылжар» орталық мешітінде ауыл имамдарына арналған біліктілікті арттыру семинары басталды. Шараны облыс имамдары ұйымдастырып отыр.

Семинардың басты мақсаты – ауылдық жерлерде діни қызмет атқаратын имамдардың кәсіби біліктілігін арттыру, олардың діни сауатын жетілдіру және заманауи діни мәселелерге қатысты білімдерін кеңейту.

Бір аптаға созылатын семинар барысында имамдардың қоғаммен байланысын нығайту, жастармен жұмыс істеу әдістері және діни насихат жүргізудің тиімді жолдары талқыланады.

Семинар соңында қатысушыларға арнайы сертификаттар беріледі. Бұл шара ауыл имамдарының білімін жетілдіруге және жергілікті халықтың діни сауатын арттыруға бағытталған.

ҚМДБ Төрағасы, Бас мүфти Наурызбай қажы Тағанұлының бұйрығымен Бекдәулет Қарабек «Қызылжар» аудандық «Кәусәр» мешітіне бас имам қызметіне тағайындалды.

Бүгін қасиетті жұмада жаңа дін қызметкерін өңірдің бас имамы Хамзат Қажымұратұлы жамағатқа арнайы таныстырды.

Бекдәулет Анарбекұлы 2015-2018 жылдары Ақтөбе қаласы Ақтөбе медресе колледжін «Исламтану» мамандығы бойынша бітірген. 2018-2021 жылдар аралығында Алматы қаласындағы «Нұр-Мүбәрак» университетінде оқыған. 2021 жылы Петропавл қалалық «Қызылжар» мешітінде наиб имам қызметін атқарған. Кейін 2021-2023 жылдары Ақтөбе облысындағы «Ақтөбе» медресе колледжінде еңбек еткен. 2023 жылдан бастап бүгінгі күнге дейін қалалық «Нұр» мешітінде наиб имам қызметін атқарды.

Жамағат алдында таныстырып өткеннен кейін өңірдің бас имамы Хамзат Қажымұратұлы Бекдәулет Анарбекұлына алдағы жауапты қызметіне сәттілік тіледі.

Солтүстік Қазақстан облыстық «Қызылжар» орталық мешітінің ұйымдастыруымен 7-і мен 18 жас аралығындағы шәкірттер арасында Нұрмағамбет Балтабайұлының рухына бағышталған 5-ші облыстық Құран жарысы өтті.

Байқауға облыс бойынша 70-ке тарта шәкірт қатысты. Сайыс келесі номинациялар бойынша өтті:  10 сүре, 22 сүре, Жарты пара, 1 пара, 2 пара, 3 пара.

Шәкірттер Құран жаттап қана қоймай, әртүрлі тақырыптарда Пайғамбарымыздың (оған Алланың салауаты мен сәлемі болсын) хадистерін, қазақ ұлыларының сөзін мүдірмей  жатқа айтып берді.

Сайыс жеңімпаздары төмендегідей:

10 сүре бойынша – Әсия Бақытжанқызы;

22 сүре бойынша – Фатима Серік;

Жарты пара бойынша – Аяла Сүндет;

1 пара бойынша – Мухаммад Шәріпов

2 пара бойынша – Зулфуқар Мухсина

3 пара бойынша – Азамат Төлеухан

Аталған сайысқа өңірдің дін жанашыры демеушілік жасады. Жеңімпаз, жүлдегер шәкірттер ақшалай сыйлықпен марапатталды.

Бүгін, қасиетті жұма күні ел мешіттерінде халқымыздың руханиятына өлшеусіз үлес қосқан марқұм болған дін қызметкерлерін еске алуға арналған Құран хатым шарасы өтті.

Аталған шара облыстық «Қызылжар» орталық мешітінде де өтті. Бұл игі іске орай жұма намазы алдында жамағатқа насихат айтылды.

Биыл Қазақстан мұсылмандары діни басқармасы өзінің 35 жылдық мерейтойын атап өтуде. Осы жылдар ішінде имам-молдалар, ұлағатты ұстаздар дін саласында елеулі еңбек етті. Сол кісілердің ықыласы мен ыждағатының арқасында дініміз бен сенімімізді сақталды.

Айта кетейік, бұл күні облыстық «Қызылжар» орталық мешітінде хатым оқылып, марқұм болған дін қызметкерлерінің рухына бағышталды. Бұл игі шара еліміздің барлық облыстық орталық мешіттерінде өткізілді.

Алла Тағала марқұм имамдарымыз бен ұстаздарымызға рақым етіп, жұмақтан орын бергей! Әмин!

Облыс орталығында ақсақалдар арасында бата беруден «Ақ бата» облыстық сайысы өтті. Іс-шараға Петропавлдан, аудандардан ақсақалдар қатысты. Сайыс екі кезеңнен тұрды. Қатысушылар салт-дәстүр жайында білімдерін көрсетіп, сұрақтарға жауап берді. Екінші кезеңде ақсақалдарға әртүрлі жағдайларда айтылатын баталардың тақырыптары берілді. Олар сол бойынша бата берді.

«Дін мен дәстүр егіз ұғым. Сондай-ақ қазақта «батаменен жер көгерер» деген нақыл сөзі бар. Осы еліміздің бір берекесін арттыру мақсатында және ақсақалдарымыздың мәртебесін көтеру мақсатында осы іс-шараны ұйымдастырдық. Заманға қарай адамы. Бірақ ақсақал болғаннан кейін, 60-70-тен асқаннан кейін дастарханда отырып бата бере алатындай жағдайда болу керек. Бата беру үшін де адамның жүріп өткен жолы болуы қажет. Өзіндік айтар сөзі болғаны жөн. «Жас кезіңде байқарың болмаса, қартайғанда айтарың болмайды» деген бар», – дейді облыстың бас имамы Хамзат Әділбеков.

Сайыс барысында қатысушылар бата беру өнерімен қатар, діни білімдері мен салт-дәстүрге жетіктігін көрсетті. Қазылар алқасы ақсақалдардың бата беру шеберлігін, тіл байлығы мен шешендігін бағалай отырып, үздіктерді анықтады. Нәтижесінде «Қызылжар» қалалық мешітінің атынан келген Тәли Кәриев бірінші орынды жеңіп алды. Жеңімпаздар бағалы сыйлықтармен марапатталды. 

ҚМДБ-ның облыстық «Қызылжар» орталық мешітінде  мұсылман қауымының ұлық мерекелерінің бірі – Ораза айт мейрамы аталып өтті. Таңғы сағат 07:30-да мешітте айт намазы оқылып, ұлық мереке құлшылықпен бастау алды.

Ұлық мейрамда ҚМДБ-ның СҚО бойынша бас имамы Хамзат Қажымұратұлы жамағатты Ораза айт мерекесімен құттықтады. Айт мерекесінің қадір-қасиетін ашықтап, бүгінгі күнді берекелі, сауапты өткізуге шақырды. Сондай-ақ өңірдің бас имамы дінге жанашырлық танытқан азаматтарға алғыс білдіріп, шапан кигізді. Мерекелік шара аясында мешіт ауласында киіз үй тігіліп, үлкен қазанда палау пісіріліп, 500-ден астам адам дәм татты.

Сонымен қатар, 20-шы шағын ауданда орналасқан «Қызылжар» қалалық мешітінде де айт мерекесіне орай түрлі іс-шаралар ұйымдастырылды. Атап айтқанда, арқан тарту, гір көтеруден спорттық жарыстар өтті. Жеңіс тұғырынан көрінгендерге бағалы сыйлықтар табысталды. Мешітте айт шайы беріліп, уағыз-насихаттар жүргізілді.

Барша мұсылман қауымының 30 күн бойы ұстаған оразасы қабыл болсын! Айт мерекесі баршамызға құт-береке әкелсін!

Солтүстік Қазақстан облысының орталық мешіті – «Қызылжар» мешітінде мұсылмандар үшін ең қасиетті түндердің бірі – Қадір түні жоғары деңгейде аталып өтті. Мешітте мың айдан да қайырлы бұл түнге орай арнайы іс-шаралар ұйымдастырылды.

Рамазан айы бойы хатым оқыған қариларға облыстың бас имамы Хамзат Қажымұратұлы алғысын білдіріп, құрмет көрсетті. Оларға сый-сияпат жасалып, шапан кигізілді.

Мешітте Қадір түніне орай уағыз-насихаттар айтылып, Рамазан айының маңызы мен қадір-қасиеті түсіндірілді. Қадір түнінде мешітке жиналған халық саны көп болды. Жамағатты сергіту, олардың діни іліміне шыңдау жүргізу мақсатында арнайы викториналық сұрақтар ойыны өткізіліп, жауап берген жамағатқа бағалы сыйлықтар табысталды. Әйел жамағаты да бұл шараға қызығушылықпен белсене қатысты. Қадір түні аясында жамағатқа арнайы сәресі ұйымдастырылып, көпшілік ризашылығын білдірді.

Барша мұсылман қауымының дұғалары қабыл болсын!