«Халал Дамудың» бас сарапшысы Айжан Омарова мен СҚО бойынша жауапты өкіл Мақсат Аманжолов жергілікті кәсіпорындарда тексеріс жүргізді.

Сертификатталған «CTR Chicken» фаст-фуд өнімдер желісін, «Bey», «Компот» және «QMDB Halal» сертификатын алуға ниетті ұн өндірісі тексерілді. 

Тексеріс барысында мейрамханалар мен асханалардың ас мәзірінен бастап, мекеме қызметкерлердің «Халал» стандартқа сай жұмыстарын бақылады.

Қорытынды акт бойынша, мекемелерде стандарт талаптарын сақтамау және бұзушылық болмады. Тексеріс оң нәтижені көрсетті.

Алдағы уақытта қалған кәсіпорындарда айлық тексеріс жалғасатын болады.

ҚМДБ-ның Петропавл қаласы бойынша өкілдігінің ұйымдастыруымен жергілікті әйел жамағатқа арналған халал турасында оқу-семинар өткізілді. Семинарға «Халал Даму» технологы Омарова Айжан қатысты. Семинардың негізгі мақсаты – от анасы, әйел қауымның дініміздегі халал мәселесі жөнінде ақпарат беріп, білімін жетілдіруге негізделген. «Ас – адамның арқауы» дейді дана халқымыз. Өйткені, ол – бойға қуат сыйлайтын тәннің азығы, Алланың нығметі деп білуіміз керек. Бірақ, көп жағдайда отбасына ас даярлау барысында әйел қауымы азық-түліктің халал-харамдығына мән бермей жатады. Пайғамбарымыз (с.а.у): «Арамнан желініп-ішілген нәрсе қырық күн бойы бойда сақталады»,- дейді. Тағы бір хадисінде: «Адал жеу – сауап, арам жеу – күнә»,- деген. Олай болса, ішер және ұсынар асымыз қалай әрі неден жасалғанына, құрамына, халал сертификаты бар-жоқтығына мән бергеніміз жөн. Себебі, халал ас жеу – Алланың әміріне бойұсыну», – деген Омарова Айжан халал өнім өндіру технологиясы, тағамдық қоспалардың құрамы мен бөлінісі жөнінде мағлұмат берді. Айта кетейік, қазіргі таңда технологтардың қатысуымен Петропавл өңіріндегі кәсіпорындарда аудит жүргізілуде.

ҚМДБ «Зекет және қайырымдылық» қорының бастамасымен «30 күнде 30 баспана» республикалық акциясының бірінші баспанасы Солтүстік Қазақстан облысы бойынша Ғ.Мүсірепов ауданы Новоишим ауылында табысталды.
Қасиетті Рамазан айының құрметіне орай ұйымдастырылған игі бастаманың кезекті шарасында, «Зекет және қайырымдылық» қорының директоры Мақсатбек Қайырғалиұлының тапсырмасымен, СҚО «Зекет және қайырымдылық» қорының өкілі Қасымхан Абдуллаұлы республика бойынша бірінші болып ораза айының алғашқы күнінде 632-ші үйдің кілтін Солтүстік Қазақстан облысы Ғ.Мүсірепов ауданы Новоишим ауылында Шупанов Амангельді Мынайдаровичтың отбасына салтаннатты түрде табыстады. Яғни, бұл үй мүмкіндігі шектеулі және 3 балалы отбасына демеушілердің көмегімен арнайы сыйға берілді.

Солтүстік Қазақстан облысы «Зекет және қайырымдылық» қорының өкілі Қасымхан Абдуллаұлы «Өмірге үміт сыйла» қайырымдылық шарасына қатысты.

ҚМДБ СҚО  өкілдігіне қарасты «Зекет және қайырымдылық» қорының ұйымдастыруымен «Өмірге үміт сыйла» қайырымдылық шарасы тұрақты жүргізіліп келеді. Кезекті игі шара аясында «Остеопластоме» – сүйек ісігі  дертімен шалдыққан Алина Рамазановнаға және ІІ топтағы мүгедегі шектеулі Мирас Серикболсыновичқа емдеріне, мұқтаж отбасына 220 000 теңге қаржылай көмек берілді. Солтүстік Қазақстан облысының «Зекет және қайырымдылық» қорының өкілі Қасымхан Абдуллаұлы  дерттеріне шипа тіледі.

Солтүстік Қазақстан облысы Қызылжар орталық мешітінің ұйымдастыруымен айлардың сұлтаны болған Рамазан айының алғашқы ауызашары берілді. Ауыз ашар дастъарханына 170-ке жуық адам жиналды.
Ауызашар барысында СҚО Қызылжар орталық мешітінің бас имамы Хамзат Қажымұратұлы жамағатты келіп жеткен қасиетті рамазан айымен құттықтап, өзінің ізгі тілегін жеткізді. Сонымен қатар, «Рамазан айының қадір-қасиеті» және «Анаға деген құрмет» жайында насихат айтты.

Қызылжар орталық мешітінің баспасөз қызметі