Жолсыз және сусыз қалған ауылдардың тұрғындары сонау жылдары үделі көшкенде Қызылжарға жете алмағандай, Бескөлде тұрақтап қалғандар көп-ақ сондай-ақ ауасы таза бұл жерді ұнатып, түтін түтетіп жатқан кәсіпкерлер де аз емес.
Сәрсенбі күні Бескөлде Мәуліт өткізілгенде осыған тағы да көз жеткізе түстік. Мәулітке қатысушыларды «Қызылжар» орталық мешіттің наиб имамы Қасымхан Абдуллаұлы құттықтады және пайғамбарымыздың (с.ғ.с) өнегелі өмірі туралы кеңінен әңгіме қозғады.
Кез келген Мәуліттің өзегі болып табылатын салауатты аудандық «Кәусар» мешітінің наиб имамы Адай Жылқайдаров оқыды. Оны сахнада қоштаушылар да аз болмады.
Алла Елшісінің туған күніне жиналғандарды аудан әкімінің орынбасары Т.Есжанов құттықтады.
Осы Мәулітті ұйымдастырған аудандық «Кәусар» мешітінің бас имамы Қадырбек Шәріпов жиналғандарды құттықтап, қысқаша уағыз айтты. Сонымен бірге «Қызылжар» мешітінің наиб имамы Азамат Сәрсеновтың уағызына да құлақ түрілді.
Мәуліт мереке болғандықтан, ойын-сауыққа да орын берілді. С.Мұқанов атындағы қазақ сазды-драма театрының әртістері сахналық көріністер көрсетті. Мәуліт өткен аудандық мәдениет үйінің әншілері өнер көрсетті. Ал мешіттің кішкентай шәкірттері хадистер оқып берді.
Мәуліт соңында дәмханада ас берілді.
«Қызылжар» орталық мешітінің
баспасөз қызметі
